華華前幾日去到中電旺角總部，同老頂包立賢做訪問，訪問中途，赫然發現喺中電會議室裏面，居然出現一張唔係好應該喺度出現嘅相，就係有意做中電世界嘅中港電力股東潘國濂嘅相（圖）。
莫非中電想攞佢嚟做飛鏢靶？非也非也，其實中電擺佢張相喺度，全因為佢十幾年前做過中電董事，中電一視同仁，所有董事相都掛出嚟，就係咁簡單。
華華問包立賢識唔識潘國濂，佢話唔識，後來公關大員提水，佢先至知道佢係乜水。咁又係，若果唔係夥拍咗公主CEO李小琳，整咗壇中港電力出嚟，真係冇乜人會記得潘國濂做過中電，更冇人知道原來佢喺內地嘅人脈咁勁。雖然中港電力在港供電𠵱家十劃未有一撇，但中電都係小心啲好。