「《本能2》冇上集咁好睇！」當時電影上畫，唔少人睇完之後都係咁講。其實套戲唔太差，只係冇乜突破，講到莎姐依舊利用美色同智慧，將班差人同心理醫生玩到頭都暈。可能上集莎姐表現太深入民心，睇《本能2》時先入為主，知道莎姐講乜都係呃人，班男人同樣只係識用下體思想咁，所以感覺唔到主角互打心理戰時嗰份緊張刺激。記者：陸俊雄
又玩借刀殺人
得罪莎姐迷都要講句：「莎朗史東真係好老！」故事講佢係個引到男人流晒口水嘅小說作家，但從近鏡見到莎姐皮膚有紋，DVD畫質表現得又過份出色，令莎姐扮唔到後生！而且戲中男角，無論有冇同莎姐發生關係，都冇個靚仔或有名氣，說服唔到觀眾佢點迷死人。今集編劇高明，殺人場面唔多，突出女角借刀殺人，升咗Level，一句講晒「色字頭上一把刀呀！」
