孫柏文呢期要煩搬屋，冇辦法，業主話要收樓，唔搬唔得。咁搬屋呢樣嘢，我相信好多人都感受過。大家好多時搬屋都要煩裝修呢個問題，特別係要搬去啲好耐冇修葺過嘅舊樓。我都有為新居進行「小裝修」，特別要求加多幾個電插座。冇他嘅，今時今日淨係要插插蘇嘅電器都有幾百樣，政府又話唔好一個插座插幾十個電器，真係唔加都唔得。
式微行業及早轉工
決定安裝新插座之前，我當然要走勻全屋，諗吓新插座嘅位置。諗完之後，就一個電話叫咗個裝修師傅嚟幫我睇睇。我記得佢話：「孫生，如果要裝咁多個新插座，差唔多要鋪過新電網一樣。」我記得我咁樣答佢：「就算鋪新電網都要，一次過搞掂，就唔需要再煩呢樣嘢，亦唔使再煩個電力師傅。」
大家是否覺得非常之奇怪，我同大家講一個咁合理嘅故事。大家可能會問：「你係唔係想用呢個經驗，為大家篤爆謬論呢？」冇錯，我今日想講嘅，係有關早幾日先至啱啱宣布完業績嘅有線寬頻1097。大家都知道，我成日都鬧佢哋，鬧得最緊要嘅，當然係踢緊世界盃嗰陣。不過，今次我要撐有線。
反而對唔住啲員工
我撐有線嘅原因，係因為佢哋話要裁員。佢哋要裁員嘅理由，係因有線寬頻覆蓋全個特區嘅線網差唔多已經鋪好。就好似我嘅裝修故事一樣，「搞掂」之後唔再需要用咁多個師傅。相信大家聽起上來，都會覺得合情合理。而如果有線寬頻喺咁嘅情況之下，都唔作出裁員行動，反而會對唔住啲員工。點解我會咁講？大家試諗吓，如果你係一個年輕嘅員工，公司一日唔炒你魷魚，一日都係喺度畀你希望。如果一次過裁員，起碼可以令你知道「鋪線」係一個式微行業，愈早轉工愈着數。
不過，我睇到通訊業總工會主席葉岳峰話有線裁員唔啱，即刻令到我血壓飛升。首先，葉岳峰先生話：「香港好多地方都未鋪線，仲有好大發展空間。」雖然呢個我都有同感，因為我舊居一帶，有線真係仲未鋪線，不過我住喺非常荒蕪嘅地方，如果有線真係決定為咗「製造就業」而鋪線去我屋企，我就真係會非常擔心有線寬頻嘅前景，因為完全不符合成本利益，如果鋪線合乎成本利益，我相信有線已經鋪咗線。我希望葉岳峰先生知道，為咗我哋特區嘅長遠利益，每一間企業都要由成本效益角度出發，就算唔係為咗股東，都要為年輕員工盡早轉工着想。
等經濟差先裁員？
葉先生又講：「今次裁員純粹因為有線盈利倒退，咁樣做對前線員工好唔公平，幫你做好晒啲基建，賺咗咁多錢，𠵱家你業績差就要炒人，過橋抽板，管理階層反而唔使負責，間間公司係咁就大件事。」過橋抽板？打完齋唔要和尚？當時班師傅一路鋪線，有線都有出糧。情況完全唔似啲建築業工人，出咗勞力收唔到糧。我想問葉先生，如果當年有線電視成立嘅時候，問啲啱啱加入有線鋪線嘅同事：「你哋覺得有線鋪完線之後，你哋會點？」
你覺得佢哋會點答？
最後，香港通訊業人員協會主席陳榮禮先至最好笑，佢話：「經濟持續好轉，有線寬頻在有盈利下仍大幅裁員，對香港整體氣氛會造成負面影響。」
唔通，陳榮禮先生想經濟差嘅時候，企業先至裁員？
孫柏文