培訓專家W在銅鑼灣農圃請食飯,交流培訓心得,左丁山邊度識培訓吖,只識齋talk,美其名曰分享經驗。培訓W話訓練不同人物,如果能夠預先弄清楚受訓人物嘅家庭背景,工作背景,會收事半功倍之效。問題係參加培訓班嘅,往往幾十人至百幾人,聽演講嘅有成千人,事先對聽講人士嘅背景不甚了了,所以只能講大路嘢,一啲廣泛被接受嘅準則。
培訓W以訓練動物為例,馴服隻狗要用狗索,索住隻狗條頸。馴獸師訓練獅子,要揸住條電鞭,水族館人員訓練海豚,用逐步操控法,當一條海豚第一次從海上躍起,餵佢一條魚,去到第十次,餵佢成桶魚。至於訓練頑皮馬騮,有乜方法?培訓W在廣西親眼見到馬戲團訓練猴子騎單車,隻頑皮星食完香蕉就周圍郁,係都唔肯騎,嗰位負責訓練嘅仁兄突然捉一隻公雞出嚟,捻住雞頸,喺猴子眼前引刀一割,雞血慢慢滴落地,猴子立即唔敢望,拚命騎單車,培訓W睇到咁嘅場面,發揮香港城市人嘅反應,驚呼一聲哎,一分鐘後,佢醒起古人成語殺雞儆猴,原來係有實證嘅,並非空口講白話。
培訓W話好多人嘅行為模式基本上從家庭父母兄弟之互動關係而來,經過十幾二十年Conditioning所致,唔係無端端發生嘅,對一位吸煙食丸嘅金毛仔講:「勤力發奮讀書啦,將來有前途,九成冇用,一位青少年之鍾意吸煙食丸,多數與家庭有關!」
培訓W跟過一位德國心理專家到中國治療家庭問題,發覺問題之大,不知從何做起,主因係毛澤東剷除仁義禮智信之傳統儒家觀念後,再經文革折磨,唔少同胞只崇拜權威與金錢,其他不理,如果開會時講幾句客套話:「請多多指教,包涵、包涵」就會俾人指到頭擰擰,眼光光,撞咗板都唔知乜嘢事。培訓W並非學院派,而係一點一滴累積經驗教訓而成為專家嘅,問佢點解會咁成功,佢話要先了解佢嘅家庭喎。