香港人貪心慣，食餐飯，最好就有得玩有得食。今次有食肆開正呢瓣喇，喺餐廳內搞番個山東市集，畀客人玩遊戲送銅錢，拎住銅錢就可以去市集Shopping，幾十款小食亁貨任你揀。睇真啲，其實變相係個優惠，在場所有小食擺明送畀客人，食正港人貪小便宜心態，食餐飯想開心，講真就係咁簡單。
記者：黃若茵
攝影：陳陶鈞、楊錦文
模特兒：Canis&Va（Salvador）
玩噱頭擺明益街坊
「梁山泊」搞山東市集，附設擲豆袋同挑竹籤兩個簡單遊戲，玩完可以換銅錢，銅錢又可以換小食，擺到明益食客，點解咁蝕？經理Joe話：「希望同客人多啲互動溝通，玩遊戲換小食，可以同客人講多啲有關中國東北小食嘅話題。」唏，答得好官腔好冠冕堂皇喎，見餐廳門口布置到古時市集咁，加強溝通又使唔使咁大陣仗呀？「其實今次想做啲優惠回饋客人，但如果就咁將件小食送畀客人，客人只會覺得：『OK吖，有嘢送。』唔會覺得特別開心。有遊戲玩就唔同，自己拎住銅錢換心水小食，感覺更多Fun。」講到尾即係玩噱頭囉。
主打新派東北菜
噱頭嘢講完，入番正題，「梁山泊」主打新派中國東北菜，何謂新派？Joe話：「首先，東北人用嘅食材好單調，主要食河鮮、豬肉同羊肉，我哋就加多啲香港人常用食材，例如海蝦，甚至西餐用嘅龍脷我哋都會有。另外，北方人因為天氣凍，煮食比較多油，喺香港就無呢個必要，我哋做小炒落好少油，配合番𠵱家嘅健康潮流嘛。」餐廳既有來自中國東北嘅師傅坐鎮，唔難發現菜式多數都帶辣、多香料，擲完豆袋，喫完東北小食，記得認真試清楚東北菜精髓呀。
1.大紅袍公雞$188
賣相做法似川菜辣子雞，雞髀肉先炸後炒，再跟東北燈籠椒一齊回鑊炸，面層酥脆，咬一口舌頭即時發麻，但不掩雞香。
2.醉香花蛤$88
花蛤5至9月最大隻多肉，師傅用玫瑰露同辣椒煮成汁，浸住一隻隻煮熟嘅花蛤，入口先有酒香再有啲啲辣味，直接刺激喉嚨。
3.蒸炸馬蘭頭$68
馬蘭頭味道介乎香草同蔬菜之間，粉皮包住蒸，口感煙韌保持到馬蘭頭鮮味，脆炸就好香口，不過略嫌遮蓋咗菜嘅鮮味。
4.刺青$78
豬面青包住用豆做嘅素翅，煙韌爽脆雙重口感好鬼夾，點醋食更開胃。賣相包裝得好精緻，好有日本風味。
5.荷花池每鍋$288
大片荷葉包住熬好嘅清湯，拆開荷花香氣撲鼻，湯中有冬瓜粒、冬菇粒、百合等，口味配搭得當，啖啖清新香口。
6.清炒翡翠$88
翠綠色青菜名為烏笋，係北方人常吃嘅蔬菜，略略調味並無加入其他配料，以保持原味，入口似咬青瓜，但更爽脆。
直擊食客心水
山東市集有鹵水、糖水、糕點、湯圓等多種小吃，玩遊戲換銅錢再換小食。我做咗個小統計，睇吓邊款小食最受歡迎？
冰糖車厘茄（1個銅錢）
Kristy：「街邊都有賣冰糖葫蘆，不過我怕唔亁淨唔敢食，難得呢度有，一定要食。」
芝麻糊（2個銅錢）
Amy：「比平時糖水舖食嗰啲大成倍，唔使錢有得食，抵呀。」
五香豆腐（1個銅錢）
Pak：「唔似鹵水豆腐咁一味得個鹹字，好重香料味。」
酸白菜（1個銅錢）
Ronald：「我鍾意食辣，酸白菜好似韓國泡菜，但辣味仲勁，好醒胃。」
擂沙湯圓（1個銅錢）
Joanna：「即叫即做，入面包熱辣辣芝麻餡，好味道。」
蒸花生（1個銅錢）
Steven：「都未見過用蒸籠蒸花生，食落好香口。」
鬆糕及白糖糕（各1個銅錢）
Darren：「一坐低已經好肚餓，玩個遊戲就換到2件鬆糕，頂吓肚都好。」
鵪鶉蛋（1個銅錢）
Tammy：「呢度嘅鵪鶉蛋用五香鹵水整，幾得意。」
搵食攻略
梁山泊（31020088）
地址：銅鑼灣時代廣場12樓05號舖
營業時間：12:00nn-3:30pm，6:00pm-11:30pm
交通：銅鑼灣地鐵站A出口，晚市惠顧滿$200可獲2小時免費泊車
全店座位：108個，特設廂房
最好賣：大紅袍公雞日賣25份
註：每枱8位或以下玩1次擲豆袋，每枱8位以上玩1次挑竹籤