5月鴻運、7月大發、8月永業，前後三個月三間經紀行爆煲。更加得人驚嘅係，呢幾個月個股市基本上風平浪靜幾好炒，咁好市啲經紀都唔掂，你話萬一崩盤咪凍過水？
冇晒心機嘅經紀A話，出事嘅經紀都唔係本身生意有問題。你話生意唔夠做，最多收縮皮費，點都唔至於撻客戶啲貨。所以唔可以賴銀行競爭。以佢自己為例，佢啲客試過在網上買賣，結果都係嫌慢幫襯番佢。
信心危機隨時爆發
其實幾單嘢涉及經紀本身操守，雖然受影響嘅客戶數目唔多，銀碼亦唔大，但喺行內造成嘅破壞就好大。華華聽到有好多間行都有客戶提貨，你話再有一間出事，信心危機隨時全面爆發。講到呢度，經紀A馬上插嘴，話據佢收到嘅風，真係仲有人有問題，爭在幾時俾證監查到。
分析C聽到佢咁講，叫大家唔好危言聳聽。依佢嘅睇法，咁多隻爆咗煲，上面都好驚。從政治考慮，短期之內會留番啲力，唔會再篤爆啲波住。否則，呢個國際金融中心顏面何存？佢咁講有一定道理。但係咁，咪即係有人失職？
詹議員係時候出嚟
在網上交易普及化，銀行又大力搶客嘅形勢下，傳統小經紀好難做，爆煲事件只係雪上加霜。點樣重建小股民信心係當務之急，詹議員應該出嚟搞搞佢，例如迫吓中央結算做嘢。好似佢哋個獨立戶口，冇錯可以解決信心問題，可惜1998年開始到𠵱家，戶口數目竟然只得萬五個，相比全港160萬股民，真係小得可憐。一個產品咁唔受歡迎，係戶口本身唔完善？係推廣不力？係咪有人要負責？
李華華