爾冬陞（小寶）導演近日接受內地傳媒訪問，大談同佢合作過嘅演員，佢話梁朝偉係一個仲有得提升嘅演員，同劉德華唔同，佢嘅演技就好似飲紅酒咁，要慢慢品嚐，但佢覺得偉仔同王家衞嘅合作已經去到頂點，因為佢哋兩個太熟啦，偉仔應該同自己合作先啱。
華仔接受批評
不過小寶話搵過偉仔幾次都唔覆佢電話，有一次喺某個場合見到偉仔，佢大呻就快退休，偉仔即時好認真咁問番佢係咪真嘅。
小寶又話偉仔以前拍佢套《癲佬正傳》時太投入，一度拍到有點神經質，當時佢仲好擔心，驚偉仔鑽牛角尖走去自殺就唔知點收科。
小寶以前同劉德華合作《烈火戰車》，近日再合作《門徒》，佢話今次合作覺得華仔變咗，演技老練同成熟咗，對自己嘅形象亦冇咁執着，之前黃秋生批評華仔做嚟做去都係劉德華，小寶覺得秋生講嘅係真心話，佢話華仔份人勝在唔小器，換轉其他人就未必受得住咁嘅批評。
