平日嘅中環經常人頭湧湧，尤其係LunchHour，根本係人多到嚇死你，隨時迫到會有人行出馬路，揸車經過要特別小心，尤其係租庇利街與德輔道中的十字路口，右轉時記得要望清楚。
記者、攝影：鄭達基
黑點一
租庇利街 右轉要看清
危險指數：★★★★★
租庇利街與德輔道中，近恒生銀行總行嘅十字路口，可算係中環其中一個交通黑點，主要原因是從租庇利街右轉德輔道中嘅車輛，視線或會被電車所阻，同時由於路口缺乏行人過路燈，加上鄰近電車站，行人衝出馬路嘅機會甚高，大家途經時要特別小心。
黑點二
干諾道中天橋 落斜咪太快
危險指數：★★★★☆
干諾道天橋往中環方向落橋位，呢個係較急嘅右彎，車速太快會有危險。另外，民祥街跟民吉街駛出干諾道中嘅車輛，在讓線位或未必可以看得清右方有無車駛過來，加上該處車速較高，行經該處記得小心為上。
黑點三
金融街 行人亂過路
危險指數：★★★☆☆
國際金融中心二期對開嘅金融街，車流雖然唔多，但始終附近是停車場跟小巴總站出入口，不遠處更是巴士總站同埋往返離島嘅港外線碼頭，每逢上下班時間都會有好多人亂過馬路，若不留神便很容易發生意外。
