港股進入業績公布高峯期，其中從事手機設計、以及生產液晶體顯示模塊為主業的晨訊科技（2000），將於明日公布中期業績，有人估計盈利持續增長，加上隻股有大陸3G概念撐住，所以近排由低位反彈幅度唔細。晨訊上周五大升7.24％，收4元。
經紀黃話，晨訊主要股東在3月份以3.49元減持舊股，但股價不跌反升，最高見過4.525元。不過，6月初因整體大市氣氛逆轉，晨訊股價亦一度回落至3.20元水平，但有基金趁低密密吸納，反映隻股有一定留意價值。
另外，中信國際金融（183）上周公布業績令人失望，係少數盈利倒退的本地銀行股，證券行即時調低中信國金的盈利預測，上周五跌5.24％，收4.16元。
經紀黃話，隻股有後着，唔應該睇得太淡，皆因收購中信銀行股權的交易仍然在進行中，而中信銀行來港上市亦搞得如火如荼，如果兩單嘢一齊搞掂，中信國金將重新估值。
慕容小初