護花開車門冧掂未來外母
三姨太讚超雲男友：「何生都話好」

名人第二代暑期夜蒲玩到喪，一向家教好嚴、賭王三房嘅17歲大女何超雲前晚就由三姨太陪同下拍拖出街。
何鴻燊三姨太陳婉珍，前晚帶同一對女兒何超雲、何超蓮出席大會堂嘅《吉賽爾》芭蕾舞表演，同何超雲拍拖五個月嘅澳門大學生男友李景圖仲首次公開亮相，全程陪住何家女眷，明顯得到三太首肯兼確認身份。

戴情侶鈪

呢位何家未來小女婿一身粉紅色套裝，勁有183Club嘅味道，佢都非常識做同有風度，喺傳媒人堆中小心護住女友，臨走時仲負責開車門。
超雲喺阿媽面前都忍唔住蹺實男朋友隻手行，仲戴埋情侶鈪，但三太仍然堅持說：「唔係男朋友，朋友啫，冇拍拖。」拖手都唔算拍拖？「喺父母心目中，咁樣唔算拍拖，我同佢傾過，佢唔會拍拖住，佢自己知道要讀完書先拍拖，最起碼都讀大學。」問佢對男方印象點樣？三太說：「幾好，幾純品，何生都見過，話幾好。」
賭王呢位未來小女婿，今年21歲，係澳門科技大學二年級學生，主修國際旅遊管理課程，中學就讀澳門名牌男校粵華中學，佢早前俾傳媒發現同賭王打對台，幫金沙集團打暑期工，而且佢仲透露過同何超雲拍拖有壓力，但前晚就封口唔肯答任何問題。