電子遊戲改成電影早成潮流，不過普遍睇到人媽聲四起，你睇《生化危機》、《鬼屋》改到不知所謂兼求其就知。以戲論戲，《鬼魅山房》（SilentHill）算係改編得最好嘅驚嚇電影；混入幾代遊戲版設定及劇情，拍得有條不紊，最難得係遊戲內超騎呢怪物得以保留，仲大灑血花，割喉、燒人兼生剝人皮，堪稱超血腥版《SilentHill》！
記者：徐影龍
恐怖CG夠真實
雖然隻Game喺打機界無人不識，不過拍成電影，點都要顧及未接觸過嘅觀眾，《鬼魅山房》就加入大量超血腥變態鏡頭，務求用驚嚇元素搶票房。電影內未有密集式灑血花，但幕幕驚心血腥，而且計算準確，每每想瞌眼瞓時，總有「驚喜」出現！
經典騎呢怪物出籠
幾代《SilentHill》出過唔少經典怪物，嚟到電影版一樣有機會出場，如五官嗱埋一嚿嘅變態護士（TheNurses），揸住手術刀係咁片，玩晒制服誘惑；因強姦Alessa嘅清潔工Colin，亦被巫女懲罰成SM男（Janitor），雙腳被拗後，再用有刺鐵線綑綁喺頭度，要行要走只得靠雙手，實在騎呢；連遊戲入面最猛料嘅三角魔（PyramidHead）都會出嚟獻技，佢把高過人嘅大刀不停喪斬，而且一如遊戲般冇弱點，撞正佢只有速逃！
不過講到最有氣勢，肯定係黑魔Alessa血洗教堂一幕，幾千條有刺鐵線滿場飛，將一班異教徒「再殺」一次，更將罪魁禍首嘅教主Christabella分屍！
3區表現有驚喜
今次港版3區並非美國進口貨，所以售價較抵玩，旺角碟舖約賣$88。本來賣咁平冇乜期望，不過根據台灣發燒戲迷網站「DVD數位討論區」入面嘅Post，除咗稱讚3區碟緊貼1區推出外，亦有人對比兩個版本嘅聲畫質素；兩者有齊DD-EX同DTSES兩大6.1環迴音效，表現亦算貼近，尤其係警報系統啓動時嘅「嗚嗚聲」，亦做到好立體嘅Surronud效果，有驚喜。不過喺畫面上明顯3區碟較重雜訊，尤其係進入「裏．世界」後嘅黑暗環境，「粒粒」的確較礙眼，未知是否由中港壓碟關係。
雖然3區只得單碟兼冇Bonus（預告片、相片集唔算數），不過觀其聲畫質素，做試機碟亦唔算失禮㗎喇。筆者最期望嘅，係會推出傳聞因太血腥兼三粒幾鐘而被Cut走嘅原裝版本！
電影解碼
由於電影版忠於原著，好多遊戲版內嘅世界觀同設定，都睇到觀眾「矇查查」，以下解說應該幫到大家。
電影內分為「真實世界」、「表．世界」同「裏．世界」，飄住煤炭灰嘅係「表．世界」，一眾30年前已死嘅異教徒，就係被黑魔困住喺呢度。而周遭突然變暗及變爛嘅時侯，就代表裏．世界出現，所有死喺黑魔手上嘅人，都會變成怪物出嚟瘋狂殺戮異教徒。
官方網址：www.sonypictures.com/movies/silenthill/