每次有人話去浸溫泉，我都受唔住誘惑，既可美容亦可醫吓周身病痛！珠海太多人，但總不成下下飛去外國浸。今次終於畀我發現到一間勁有峇里Feel的新天然溫泉度假村，從尖沙嘴坐4小時車程就到，最重要係，連接送2日1夜都係$398咋。
記者：馮敏兒 攝影：黃子偉
模特兒：Zoe、Karen@DeliciousModel
5星級河上溫泉 浸過凌晨
御臨門溫泉度假村距河源1小時半車程，一落腳我們就衝入自己間好有峇里風情的房間，嘩真係好舒服，出浴時身影透過磨砂玻璃而見一剪影，好鬼誘人！這個5星級的溫泉建在河上，溫泉眼水溫有86℃，略帶硫磺味，水質對治療心血管病、皮膚美容和瘦身都有幫助。其實現在開放的只有河中溫泉區，還有田園溫泉區和再大4倍的山地溫泉區未開放，河中區的30多個池有各種溫度和療效，有啲置身河中，像留給情侶的小孤島，又有大得像泳池的滾水池，因為剛貫注新泉水，熱到飛起。有太極式的旋渦水按摩，又有靈芝泉和娘酒泉，溫度在36℃-42℃之間，在晚上可以浸到凌晨1時。因為現時是夏天，又新開業，所以人少更舒服。
溫泉判官
御臨門溫泉度假村環境整體都幾靚，但就是太新，設施不足，所以要帶齊個人衞生用品，否則可要坐10多分鐘車才可以出到最近的市鎮。而早餐沒有奶茶、咖啡和麵包供應亦令我整日沒精打采，已經向度假村反映，他們已承諾改善，希望你不會像我般狼狽！
遇水壩溢洪 成頭條新聞
雖說浸溫泉休息一下已經好享受，但咁遠嚟到點可以唔周圍玩玩。往溫泉途經的河源市，從沙頭角向東北方向乘車2小時，就是竊蛋恐龍的根據地，東江水的源頭，曾經一度供應半個廣東省電力的新豐江大水壩的所在地。我們那日更遇上10年難逢一遇的水壩溢洪，睇見萬綠湖的湖水以每秒175立方米的速度射出，真係好似巨龍噴火，非常壯觀成當地頭條新聞。
掃零食甜品 補身一次過
河源仲有唔少景點，例如晚上才亮燈噴水的全亞洲最大的河心噴水池。我們在沿岸買了一些當地特產手信，原來最有名的特產是五指毛桃，上等原藥材¥20一斤，大醫師配方的成品，是健脾補藥，不過我還是最愛食那兒的板栗、金柚糕和躉軟糖，長途旅程一流。
河源是客家菜故鄉，東江鹽焗雞，八刀湯（即豬雜湯）……比香港食到的更原汁原味，要不是走入三和酒樓的廚房偷師，也不知秘密原來是柴火燒出來的缽仔飯，¥1缽咋！
遊Guide
1.御臨門溫泉度假村短線遊
新華旅遊推出的全新峇里主題溫泉旅行團，包括2日1夜及3日2夜，除享受御臨門山谷的溫泉和峇里風情度假村外，行程亦包括新豐江大水壩、恐龍博物館、惠州客家博物館和梅菜一條街等。直通車直往，回程深圳解散。團費由$398起。查詢：27222888
2.御臨門溫泉度假村
地址：廣東河源市紫金縣九和鎮
電話：（86）7627498888
網址：www.iphotspring.com
交通：從深圳羅湖城外巴士站有大巴開往紫金縣，在九和鎮下車，轉乘電單車，10分鐘就到。
3.土特產超市上面的道地五指毛桃還大過自己個招牌，五指毛桃的地位可見一斑！
地點：河源市河岸正對全亞洲最大噴水池
電話：（86）7623397986
4.河源的酒家叫飯多就是缽仔飯。我到過的就位於河源市新港鎮港中路98號三和酒樓。查詢：（86）7628780398