香港嘅教育制度有幾唔掂？睇吓每年趕住去浸鹹水嘅人數就知。一班有意赴英嘅莘莘學子噚日就迫爆由英國文化協會舉辦嘅「英國院校招生展」，八方仲喺會場度見到湯家驊夫婦同埋囝囝，帶埋A-Level成績表去搵學校。
湯家驊話，其實已經有三間英國嘅大學收咗囝囝，不過佢哋仲想睇多幾間。會場內有成80幾間大學，佢哋周圍問吓睇吓，卒之都搵到心頭好，即場面試之後就取錄咗，佢唔肯講係邊間大學，但係就話囝囝最想入呢間。
英國生活指數出名高，湯大狀估計每年學費至少10幾萬，仲同八方呻：「唉……要打多幾場官司喇，你知做議員賺唔到錢啦！」為咗陪乖仔開學，湯家驊同太太9月會一齊飛去英國，搞埋戶口、電話、買書等雜務先返香港。呢個爸爸出錢又出力，真係偉大。