嘩！今晚我愛隊曼聯開「咧」首仗對上屆作客成績包尾嘅富咸，要贏波？soeasy！
倚重老將真可悲
雖然我鍾意曼聯，但我反覺今季利物浦奪冠機會較高。之前社區盾先贏車路士，利記今季最主要嘅兩個收購比拿美同賓納，原本已響英超搵食，好快融入球隊。車仔嗰邊嘅舒夫「軍刀」同「波仔」波歷克，就未必咁快適應到喇！所以我睇未必又係車仔天下。由於利記冠軍賠率有成7.5倍，我已經投注咗二百蚊，希望季尾有錢收啦！
講番我愛隊，唉！上季入成21球嘅雲佬都可以被賣走，只簽入卡域克，「卡士」唔夠；之前友賽無錯表現算合格，但我覺得紅魔𠵱家仲倚賴緊老將傑斯同史高斯係好可悲嘅事。唔買人都算，MartinLee（年輕球員，唔係李柱銘）、巴士利呢班後生仔有大進步時，轉頭居然被借到其他球會，都唔知費蛇點諗？
我一輪牢騷，都只不過痛之深，責之切。點都好，今晚頭威頭勢要先打低富咸，各位紅魔鬼fans，我哋一齊為愛隊打氣！
WENDY
由歐國盃EuroBabes，變身球彩台受歡迎主持。