幾個月唔見行街M，呢日喺戲院里碰到佢，幾乎嚇咗一跳。行街M本是珠圓玉潤靚女，點解𠵱家好似成個人殘咗一半，瘦咗三成？（行街乃上一代salesman之俗稱，推銷產品之人，日日路上行，未免腳拂拂，故稱「行街」）行街M苦笑曰：「三個月前俾人挖角，人工多兩成，但營銷佣金多一半，咁至吸引我轉工。點知新老闆十分苛求，所以做到儍晒。都好，當係收身代言人啦，縮咗條腰都係好事。」
行街M話佢嘅營銷總監係四十幾歲女士，未結婚，係工作狂，鍾意女人多過鍾意男人。佢哋成班營銷部同事日間就Call客推銷、寫報告，到咗黃昏六點半以後，總監就會Call各人開會滙報，總監晚上有約會，開會到八點前就散會，如果佢冇約會，慘咯，可以開到十點幾，大家搏命腦震盪。有一次最誇張就係開到凌晨一點，行街M返到屋企沖個涼，倒頭便睡，點知手機響起，總監好興奮咁大叫：「我諗到一條絕世好橋，你哋快啲返公司，再開會傾過，聽朝立即執行。」行街M望吓個鐘，係早上三時。
有一次，總監在晚上十二時打電話嚟：「你喺邊呀？」行街M答：「啱啱上牀。」總監居然話：「要瞓覺就熄手機啦，嘈住你唔好意思，嗱，聽日你去見大客，要咁咁咁……」一講就係半個小時，令行街M睡意全消。第二日，行街M靜靜雞同上司講：「夜晚瞓覺，可唔可以熄手機，費事畀總監嘈？」上司話：「你想死，我點解搵你返嚟呀，因為你嘅前任儍仔K就真係瞓覺熄咗電話，第二朝就畀總監炒咗！」
老細兩個口，冇辦法，唯有睇佢面色做人。左丁山問行街M：「搵工唔係咁難啩，咁辛苦，炒自己魷魚啦！」行街M話：「我貪人工好，佣金高，總監有時幾闊綽㗎，我哋超額完成quota，佢就請我哋大吃大喝，wet足一晚。我諗通嘞，有風要駛盡𢃇，我手頭仲有啲好客，頂得順總監嘅要求。到佢有一日黑口黑面對住我，話我有老態步伐追唔上時代，我就會自動消失！」