120斤重、長5呎多啲，唔……一於生劏咗佢。大家唔好尖叫住，唔係《人肉叉燒包》情節，只係劏龍躉。不過生劏畫面滿地血，同人肉叉燒包有得揮，唔知有幸定不幸，我親眼目睹生劏場面，真係諗過轉食齋，不過食完新鮮即煮的龍躉肉後即笑三聲，肉質彈牙堪稱魚王，龍躉先生我對你唔住喇。劏龍躉，都要有番個咁上下份量嘅大廚，唔係講體重，講緊嘅係集中國十大名廚、國際烹飪大師、法國廚皇會名譽主席等名銜於一身嘅幟哥（黃永幟）。佢話：「生劏龍躉，第一刀要喺魚背骨最頭一節落刀，要快、狠、準。呢個位最多神經，魚頭骨好硬好大，要用削骨刀一刀斬頭。我試過把刀唔夠利斬得唔好，條魚掙扎魚尾一拍，就俾佢鋒利嘅魚鰭整傷手。」
一刀解決龍躉後，就要將血放清，否則肉質會變差。咁大條龍躉肉質會唔會嚡口？「當然唔會，100斤至150斤嘅龍躉最好食。」佢一入行就開始接觸龍躉，𠵱家喺沙巴有漁船兼營海鮮批發，入嘅海鮮份外正。怕唔怕龍躉有雪卡毒？「呢個係海域問題，有毒龍躉通常嚟自受污染海域，食開垃圾嘅魚當然有毒啦。」「龍皇酒家」嘅龍躉，全部嚟自印尼、菲律賓等不受污染的海域，喺大海洋返番嚟嘅魚，肉質特別滑，不過100斤以上龍躉可遇不可求，有興趣嘅朋友最好預先打探幾時有龍躉返貨喇。
記者︰方綺君
攝影︰陳盛臣
紅寶三椒炒龍躉扣$198
龍躉扣即胃部，新鮮龍躉個胃一啲都唔腥，要先煲3個半小時再落鑊炒，口感好似食花膠，忍唔住食完一件又一件。
野山天麻燉九節龍骨 4位用$688
九節龍骨又叫煙囪骨，喺魚背骨最前頭位置，龍躉係深海魚，有防癌消炎功效，天麻則有助去頭風，唔只好食，仲好補。
古法燜龍躉翅 4位用$298
尾鰭、撥水鰭同背鰭都可以做此菜式，魚翅略炸，加北菇、支竹、火腩燜，入口外皮香脆肉質嫩滑。
龍皇酒家（28669932）
地址：灣仔軒尼詩道33號皇悅酒店地庫2層