不嬲都話香港係文化沙漠，但香港出版總會同新城財經台就好唔忿氣，搵咗馬會贊助搞「讀書月2006」活動，噚日仲請咗滙豐亞太區經濟顧問George梁兆基同埋食神李純恩，喺時代廣場分享閱讀心得。
唔知係咪銀行界近排鬥得激烈，佐治梁成日好夜先返到屋企，開電視又驚嘈醒老婆，夜晚孤零零，睇書就最好不過。佢床頭有本公元一世紀前古羅馬哲學家Seneca寫嘅《OntheShortnessofLife》。本書講嘅係人生苦短，好快玩完，加上陪外母食飯、揸車送仔女學琴、攞報名表，已經唔見咗好多私人空間，如果𠵱家係70歲，都唔知有冇7年係屬於自己嘅，所以佢奉勸大家要善用時間。