小儀：積蓄搣咗大半
阮小儀原名阮佩儀，現年35歲，於理工大學平面設計系畢業後，96年加入商台廣告創作部任撰稿員，三年後客串演出廣播劇《廢話小說》獲賞識，開始DJ生涯。她先協助前903總監王仲凱主持周日搞笑節目《廢話小說》，後開始夥拍森美一同主持節目。小儀至今近10年的DJ生涯裏，今次的非禮選舉風波，算是一大挫折。
小儀說：「客觀啲睇，件事係做錯咗，𠵱家我哋都有上培訓堂，原來唔上呢啲堂真係好多嘢都唔知。其實啲守則入職時已學過，就好似讀書咁，過一排睇番提醒吓，警惕番自己要小心囉。」小儀最深刻的是楊振耀在課堂中謂「小心係應該，但創意都唔可以抹煞。」她對此說：「佢講得好好，但點樣平衡好重要囉。」
小儀是家中獨女，年前開始獨居生活，停職時也趁空回家陪父母，其實今次風波對她事業影響不大，親情和友情帶給她更多溫暖，她說：「好多朋友約我食飯，冇一餐要我畀錢。」的確，兩個月沒有入息，怎不頭痛？她說：「唔係冇錢開飯，不過供樓養家都要錢，我啲積蓄都搣咗大半啦。」
冇仔約好hurt
與森美合作多年，焦點都在男方身上，小儀常被取笑身高與年齡，成為被欺負的弱者，她說：「私底下我惡過佢，佢話我矮話我老都算，話我冇婚結冇男仔約先hurt，不過講笑啫，我哋合作咗10年，佢知我底線，過火我嬲嘅話佢會收㗎，為節目冇所謂啦。」
事實上，森美和小儀情如兄妹，小儀沒有伴，森美擔心得給她作媒，小儀說：「對上一個男友咪佢介紹㗎囉，分咗手啦，其實個男仔質素好好，但性格唔啱，我鍾意啲wild啲嘅野性男。」野性像森美？小儀笑說：「佢係個顧家男，得把口，對住老婆冇鬼用㗎。」
有機會，森美也讓小儀突出一下，今年的歌劇團小儀就獲得一個美女角色，還會踩高蹺出場，她笑說：「我會高咗又靚咗，好多人羨慕，成個林志玲咁，好性感㗎，有件衫係大露背去到尾龍骨底㖭。」香港人壓力大，做美人壓力也大，綵排到失聲又狂發夢，但小儀說：「我本身嘅快樂指數好高㗎！」
攝影：陳慧安、王連連
場地提供：G.O.D.
