煲呔空降AO傅小慧做副廣播處長，損失最大嘅就係助理廣播處長戴健文，因為佢冇得內部晉升。朱培慶處長噚日就帶埋佢一齊出席太陽計劃畢業典禮，傅小慧就影都唔見，唔通佢學煲呔玩親疏有別？
班畢業生見到朱培慶即刻叫佢做朱Sir，佢哋真情對話咗20分鐘，有位畢業生問朱Sir點樣維繫港台員工關係，佢答得非常妙：「港台唔係商業機構，我傾向同事留長時間，大家好似大家庭咁。」言下之意，擺明唔鍾意空降啦。朱Sir仲話，做人要溫和同理性，先可以避免唔好嘅事情，睇嚟佢𠵱家對任何事都睇化咯。班畢業生畫咗幅Q版朱Sir送畀佢之外，仲送咗塊紅色嘅玉石蓮花畀佢，讚佢「出淤泥而不染」，唔通佢哋覺得港台係污泥？