懲罰的定義是甚麼？是對犯錯的人施以教訓。
森美和小儀兩個月前於商台節目《架勢堂》舉辦「我最想非禮嘅香港女藝人」網上選舉，違反了八項電台業務守則。商台被罰14萬元，由高層發表道歉聲明。
主持人森美和小儀被罰停薪留職兩個月兼不准賺外快。
時間飛逝，森美和小儀強勢復出，比以前更紅，森美自言受到商台如母雞愛小雞般的呵護，沒損失。
小儀只懊惱積蓄用了大半，卻興奮於快要演出一個像林志玲般的美女角色。
懲罰沒為二人帶來煎熬，但他們都不敢說不怕…… 撰文：蔡如玉
森美：逆境當挑戰
森美原名梁志健，現年32歲，在中文大學新聞及傳播系畢業，參與殺戮戰場DJ選拔賽後加入商台。其生鬼諧趣的主持風格甚受年輕人喜愛，年前獲黃柏高賞識簽約旗下，開戲給他孭飛做男主角，反應不算好，但也不及「非禮選舉」風波打擊大，森美說：「呢個幾月都感冒，病實辛苦啦，點知收到歌劇團個劇本唔掂，要同導演火火一齊再寫過，時間好緊迫呀。」
「好大精神壓力」
森美自言是個悲觀的人，想得愈悲就愈會積極做事，他說：「嗰啲小阻滯啫，唔順利先有挑戰，我份人係有好大精神壓力，因為成日都想做多啲嘢，唔係冇安全感，喺電台工作穩定過穩定，只係個人心多。」
被電台停職，連做了5年的中大客席講師席位都失掉，終嚐到不穩定了？有指商台拿森美小儀祭旗，他卻不認同：「祭旗呢個形容詞真係幾錯，我覺得保護啱啲，商台係幫緊我哋，好似母雞保護小雞咁，否則仲點會幫我哋諗之後要點做呢？發生事之後，無論高層定同事都好有凝聚力，連平時唔多兩句嘅見到都會搭膊頭。」
森美以前讀喇沙書院，對學校有強烈歸屬感，現在對商台也一樣，他說：「講出嚟好似好核突，我搬去廣播道住得咁近公司，朋友都話我做乜咁愛電台。」
知名度日增，私事也愈多人關心，森美被揭已婚並育有一子，年初又爆出其妻再懷孕，今次他停薪留職兩個月，一家大細怎辦？森美說：「經濟冇問題，我不嬲唔大使，由出嚟做嘢第一年已經開始儲蓄，又有定期投資，𠵱家就更加踏實，轉變咗我嘅投資組合，增加進取度，減低風險。我阿爸阿媽有錢照顧自己，仲養緊我㖭，我層樓嘅首期都係佢哋畀。好在有家，有家庭溫暖先唔慘，我阿爸仲話冇嘢做就快啲打畀小儀啦，佢一個人呀，叫佢嚟食飯啦。」經理人黃柏高也出錢出力，為森美復職後的事業鋪路，還負責歌劇團錄主題曲的費用。
「學咗寶貴一課」
事情現已告一段落，總括所有，得失怎計？森美說：「冇損失過，得益多啲，每件事都有好有壞，唔用心諗同唔用心做嘢，點會有得着？」沒損失何來懲罰？森美笑說：「商台唔係要你受折磨，我哋學咗寶貴嘅一課，唔會話發現我冇損失就唔得，唔通要我哋冇晒錢咩。我相信社會人士都唔係想我哋點，只係要畀大家知一啲正確訊息啫。」談未來，森美簡單吐出八字真言：「見步行步，有乜做乜。」
