出爐香港小姐冠軍陳茵媺一直俾人質疑佢隆胸，雖然佢否認咗好多次，但係着住件密實到上頸嘅連身裙，居然都可以露到罅，完全違反自然啦！
陳茵媺噚日同亞軍周家蔚、季軍呂慧儀同埋徐淑敏去咗美食博覽展，佢哋大受歡迎，啲男人爭住同佢哋影相，亦有唔少人上前攞簽名。就現場所見，陳茵媺着住件包到實嘅背心，都仲可以露罅，真係好奇特。今年已經25歲嘅佢，因為超齡而未能參加世界小姐選舉，無綫於是派24歲嘅周家蔚下月一號去波蘭參賽，陳茵媺話：「我會參選華裔小姐，所以唔會失望。」周家蔚就話：「我好興奮，可以識到多啲人，而且仲可以享受一下。」
愛男友一世
徐淑敏雖然三甲不入，但依然有fans自動組織聯盟，仲攞住橫額到場支持。對於男友黃重生嘅舊愛馬詩慧，早前大爆同黃分手後，黃問佢攞番佢所送嘅飾物，徐淑敏就話有信心男友唔會咁對自己，佢話：「我冇深究呢件事，但都唔重要，佢都有送首飾畀我，佢唔會有機會問我攞番。」
徐淑敏答得咁肯定，問佢係咪有信心同男友白頭到老，佢就話：「係呀﹗」
