盈大地產（432）插到落1年低位，嚟緊業績公布期，應該靚爆鏡，撈底。盈大去年度受惠貝沙灣豪宅項目入賬，業績相當靚仔。06年度亦唔例外，兼且適逢物業落成入賬高峯期，預期本年度純利增長67%到10億銀，PE跌到落4字頭，吸引到痹。
又隨住盈大阿媽盈科（008）權益變化，市場對盈大前景，感覺好撲朔迷離。但要咁睇，地產呢一瓣，仍然係搵大錢嘅項目，所以，有關人士會繼續將盈大煲大，又或者新主索性將盈大賣枱。要記住，盈大現價（2.13元）相對重估後NAV3.5元，折讓近40%，斷估若然真係有買家，出手唔會太低。以上呢兩個「純粹揣測」，對盈大都係正面。
盈大應該就快公布06年度中期（6月止）業績，買定等業績公布，博盈大升25%到2.66元，距離NAV仲有25%折讓，博盈大升上NAV3.5元，現價潛在升幅64%。
渝太炒同氣連枝
渝太地產（075）上年底NAV2.92元，現價（1.41元）相對折讓近52%，唔講得上話非常吸引，但有折讓墊底，兼且係渝港（613）系內折讓最大嘅股份。而渝太上年獲基金PMA昅中，揸咗渝太12%或9595萬股，至今一股未走過。
啱啱上星期五，同系渝港急升10%，渝太原地踏步，炒同氣連枝，渝太有得諗。短打博渝太追上渝港升幅，渝太價見1.55元，未有耐到NAV水位。
錢雋