蘇玉華短髮留念
「電話張相係我之前做舞台劇剪短頭髮時影，覺得呢生人都唔會再剪咁短頭髮，而且都幾靚，所以專登放番喺電話到留念。而留言信箱說話好簡潔，係『你好，我係蘇玉華，𠵱家唔得閒接聽你電話，有說話請留低。』因為鍾意直接啲，有說話請留低係最爽快，如果打電話搵朋友時仲要聽一大串說話先可以講嘢會好𤷪𤺧。」
陳敏之哀家出塞
「我之前做周年晚宴司儀，見到dancer頂帽好得意，所以就即刻戴起嚟影咗一張做手機wallpapaer喇。𠵱家我留言信箱內容冇乜特別，最好笑係以前同阿Rain（李彩華）一齊拍《下一站彩虹》，個個都叫我哋做皇后，連留言信箱段說話都一樣，當時我錄咗：『哀家𠵱家喺塞外打獵，有事就講低，一回宮就會盡快覆你喇』聽親啲人個個都笑死㗎。」
李樂詩扮聽電話
「個畫面好代表我嘅心情，近排冇乜心機，連個電話嘅畫面都冇特別整啲相落去，用番最簡單嘅日曆，一嚟可以提我今日係幾多號，二嚟提我做嘢，總之就係工作。我嘅留言係好簡單『Hello，我聽唔到電話，麻煩留底message』我嘅留言永遠都係夾雜中英文。以前試過扮聽電話，一開始就講『喂你點呀！好耐冇見，請你留言』好多朋友都中計。」
薛凱琪免費宣傳
「雖然hardsell啲，但近期就會用新碟封面做wallpaper，除咗可以幫隻碟宣傳之外，自己都好鍾意今次個造型。至於留言信箱，我就鍾情簡而精，最多只會講兩個字『留言』因為我驚我講得太長會畀啲打錯電話嘅人知道我係Fiona，而且𠵱家我唔可以隨便幫人錄留言，因為公司同網絡商有合約，所以我唔可以幫啲fans同朋友錄得意留言嘞。」
採訪、攝影：陳慧安、王連連、駱華齡、藍文浩、卓寶花
