有啲有錢人真係好難服侍，好似梗頸四咁，老公有錢就真係乜都得，佢喺濠江買咗間大屋，裝修咗幾年都未搬得入去住，整完又拆，拆完又整。事關梗頸四奄尖腥悶，單係整窗簾，佢同人講自己想點整，一講就講咗兩粒鐘，負責窗簾間公司就慘，錢真係唔易賺，人哋個老細帶埋班細嘅嚟服侍佢，花時間聽佢囉嗦不在講，少少唔合意，梗頸四就當眾鬧到佢哋一面屁，又問人有冇帶個腦出街，真係鬧人唔使本。