漫長嘅暑假又到尾聲，唔少巨星撐場嘅大片，又喺雷聲大雨點小嘅宿命之下被out，認真少少嘅影迷呢期自然會去睇奇斯洛夫斯基（KrzysztofKieslowski）寫劇本嘅《情獄》（Hell）、cult片迷會睇搞笑多過核突嘅《魔蟲口入》（Slither），而一家大細睇咗《反斗車王》（Cars）、《魔怪屋》（MonsterHouse）同《狼羊物語》之後，仲有套打正招牌搵湯漢斯（TomHanks）監製、老少咸宜嘅電腦動畫《小蟻霸》（AntBully）過埋個假期。撰文：戶川淳
有人話湯漢斯本身就係童心未泯，仲要喺佢發達後完全將呢方面發揮出嚟，好似佢演過《飛越童真》（Big），聲演過《反斗奇兵》（ToyStory），早幾年又監製兒童動畫《北極快車》（ThePolarExpress），片中大人車長、細路主角、惡死工人同聖誕老人都係由阿湯化身。今個星期四正式喺本港上映嘅《小蟻霸》，聽聞係湯漢斯五年前因為要讀本書畀幼稚園嘅仔聽，被個故事吸引，所以決定買個版權將佢拍成動畫片。
講真，已經50歲、髮型成個小泉純一郎嘅阿湯，早前套《達文西密碼》（TheDaVinciCode）都算係慘勝，票房係唔錯，不過口碑就真係唔多掂，未能帶挈佢賺一筆就自然要搵過條財路，有乜好過搵細路仔錢呀！今次阿湯只係做監製指指點點又袋袋平安，都算係賺得輕鬆啦！
原裝配音強勁
《小蟻霸》原本係JohnNickle嘅童話書，對象只係4至8歲嘅幼稚園學生，套片故事自然唔太複雜，講被人恰嘅10歲細路尼高，因為成日搵後院螞蟻出氣，所以被蟻魔師縮細變成同類嘅size，然後要佢學習唔好搞破壞、亂發洩同要合群嘅做人大道理。
套片另一賣點係星級配音陣容，好似尼古拉斯基治（NicolasCage）聲演神化蟻魔師、茱莉亞羅拔絲（JuliaRoberts）聲演愛心蟻護士，蟻后就由梅麗史翠普（MerylStreep）配音，不過，如果同你入場嘅細路要睇粵語配音版，呢班巨星都係徒勞無功。
導演來頭勁
其實《小蟻霸》導演尊戴維斯（JohnA.Davis）來頭亦唔少，佢2001年首部動畫長片《JimmyNeutron:BoyGenius》，曾提名奧斯卡最佳動畫，當年以天馬行空創作咗天才細路人物大獲讚賞，套《JimmyNeutron》仲受歡迎到拍埋電視動畫。
今次同湯漢斯合作《小蟻霸》，單睇片中嘅螞蟻造型，同98年嘅《蟻哥正傳》（Antz）好鬼似樣，雖然導演話佢同動畫師今次用咗好多精神心血製作螞蟻嘅表情同動作，但好似少咗佢嘅個人風格，唔通套片背後有個「大蟻霸」令阿尊冇得自由發揮？