有時，我真係覺得法國人做嘢係不可理喻，咩都話要有自家個性，兼且仲要唔正唔收貨，其中紅酒就係一個好例子；講真，呢個道理套落佢哋嘅汽車工業亦都啱使，因為Peugeot剛啱推出嘅908RC概念跑車，就切合晒上述所講嘅重點。
記者：鄭達基
20吋大胎軨夠照
908RC貴為Peugeot新推出嘅概念跑車，試問外觀點可以唔用誇張嘅Design呢？大家先唔好睇佢嘅車身線條，齋睇套軨已經包你話正斗，尺碼為前輪20吋、後輪21吋嘅20幅式合金胎軨（無錯，的確係20幅式！），已經夠嚇到你呆，襯埋低斜車頭設計及LED頭燈，望落完全有一份窮兇極惡Feel，話畀你聽千祈咪行埋去惹佢；車廂方面也是走科幻Style，單係軚盤設計已經好有型，獨立座椅仲可以畀到你十足嘅乘坐舒適度。
700匹馬力點樣擋
話明係概念跑車，性能表現當然要有番咁上下，所以廠方特別為佢安排咗一台5.5公升V12柴油HDi引擎，馬力及扭力輸出分別高達700匹及1,200Nm，配合6前速Sequential半自動波箱，極速可以超過300km/h！懸掛系統則是由同廠407房車移植過嚟，再經廠方幫佢作出SportTune後，縱使高速行車，走彎表現一啲都唔差。
