鄭嘉穎有乜用乜
「我一向鍾意簡單嘅嘢，所以每次買電話，都唔會專登影啲嘢做wallpaper，見部機有乜就用乜，而且部手機都只係用嚟打出打入，費事搞咁多嘢啦，所以我就連電話鈴聲都係用番原廠嘅，唔會特登整自己啲歌嚟做鈴聲，留言信箱我都只係用番本身網絡商內置提供嗰啲。可能自己份人崇尚自然，所以覺得咁先夠原汁原味。」
陳小春假扮華仔
「我本身有好多圖案，但最鍾意呢個兔仔圖案，搶眼得嚟又閃閃吓。不過我唔會將自己影嘅相做畫面，咁樣太娘。講到留言，以前我都有錄，最有印像嗰句係『留姓名、留電話、我係劉德華』後尾真係搵華仔幫我錄，仲收錄喺《留不底》首歌度。𠵱家轉咗台，有次亂按服務，搞到電訊公司幫我換咗留言，所以就冇再錄。」
蘇志威常見愛女
「我有次用個電話影我個女yumi同埋3歲大嘅狗大腳板，我見幾靚，於是用咗嚟做wallpaper。我好少換相，間唔中有新嘅就換吓。至於個留言就係『我𠵱家唔得閒，有乜事就講底啦，拜拜！』其實電話對我嚟講，只係負責passmessage，打吓電話同人聯絡，都唔算用嚟玩嘅，最緊要實用，唔好搞啲乜款喇！」
蔡一傑睇相Keep弗
「呢張相係我上年演唱會嘅造型，我特登放喺度，因為𠵱家又要為演唱會keep弗，所以每次睇見張相，就提醒我要努力，一定要弗過上次，咁我都有目標而做，幾好吖！但係呢排真係太忙，所以我個留言都冇乜特別搞過乜，都只係『𠵱家我做緊嘢，聽唔到你電話，請留言啦！』以前就會整啲我好鍾意嘅音樂做背景。」
