特首曾蔭權表兄香灼璣涉霸佔官地單嘢搞到一地都係，之後話曾特首祖墳被鏟，真係大吉利是。我哋呢位近來咁運滯嘅曾特首，一直保持低調，唔知係咪費事講多錯多？可能因為咁，佢太座曾鮑笑薇前日去美食博覽，都係靜雞雞。
幫襯2,000幾蚊
不過，佢行展覽嗰陣有成廿個跟班，又點低調吖？聽在場人士講，佢好快引起群眾注意，本來都見佢想走咁，但一行到賣茶葉嘅攤位，即刻醒神晒，仲走咗去雲南南澗鳳凰生態茶廠嘅攤位，想攞起人哋啱啱得咗個普洱茶葉大獎的沱茶王，呢嚿茶餅重成10公斤，負責人汪俊仲話，曾太都攞唔起嚿茶餅，所以冇買到，但係曾太最後就買咗幾個普洱茶餅，盛惠2,000幾蚊。
八方可以幾肯定，曾太冇諗過買嘢，就算係都唔會買咁貴，皆因佢埋單時，竟然帶唔夠錢，要向身邊嘅人借住先，真係幾搞笑。咁尷尬嘅嘢都做，可想而知，曾太真係好鍾意啲茶葉，忍唔到手，或者曾太買咁多普洱茶葉，只係因為知道老公呢排好煩，畀佢飲啖茶，降吓火。
畀錢冇乜點講價
汪俊仲話，曾太畀錢時都冇乜點講價，但各位千祈唔好以為曾太數口唔精，因為佢呢2,000蚊或者會有賺㗎。靚嘅雲南普洱茶，據汪俊仲講，就好似「永不跌價的股票」咁，放得越耐，價錢越高，隨時升值，「同一個茶餅，如果是好貨色，今年賣300，明年會賣300多，400的。」
老闆嘅市場觸覺都唔弱，即刻影低曾太嘅倩影，噚日見到八方，嗱嗱臨畀八方睇，仲話：「我們很快在香港辦零售，那時候將相放出來，當宣傳嘛！」曾太同老公去新加坡，俾黃亞細肉骨茶落面，𠵱家就有另一種「茶」嘅老闆咁畀面，呢番盛情，唔知可唔可以一雪前恥呢？