英超聯今日重開，為答謝各位長期支持，今日推介兩場重心賽事畀大家。
首先係錫菲聯對利物浦。錫菲聯今季亦有四出招兵買馬，但略嫌所羅致球員質素一般，要喺英超站穩陣腳，唔係易事，有辦你睇有上季嘅新特蘭同前季嘅諾域治，最終都係降班收場。今晚開「咧」對住實力強勁嘅利物浦，錫菲聯輸波可能係意料中事。
雖然利記喺熱身賽表現麻麻，連輸3場，不過一去到正式賽事，實力就返晒嚟。上場社區盾對住車路士一樣冇面畀，照贏可也。
翻查利記上季作客3支「升班馬」都贏晒，預料今場都唔會例外。但恐防佢季初上力未夠，只可以小勝而回。為穩陣起見，揀個「主客和」的「客勝」較為安全。
不來梅利華古遜鬥「大」
另一場推介就係德甲嘅雲達不來梅主場對利華古遜。不來梅今季有個好開始，先在德聯盃擊敗拜仁捧盃，上仗作客漢諾威兩度落後下，仍能反勝4:2，呢點就證明不來梅攻強守弱。雖然利華古遜今季賣走「單天保至尊」嘅貝碧托夫，但仍無減球隊整體實力，上場主場照贏亞琛3:0。
兩隊波同屬攻強守弱分子，近30次碰頭，25次開出入球「大」，機會率高達八成幾。雖然入球「大」賠率較熱，但用嚟過關做膽。有線球彩台主持
阿鵬
電郵：[email protected]