侍仔：家陣啲美式連鎖快餐店真係多花臣，早幾年除咗賣包之外仲賣埋飯；早日更加話賣埋下午茶，唔知會唔會影響到自己生意㖭！
招積域：皇帝唔急太監急，你老細都未出聲，你喺度嘈乜呢？
菠蘿文：放心喎侍仔，美式連鎖快餐店有冇得睇波先？服務員姐姐又會唔會經常行過來同你吹水呢？佢哋有佢哋嘅局限，做飲食嘅最重要啱口味。賣飯又點呢？賣賣吓咪又變番賣包，侍仔定啲喎！我實撐你！
林伯：係囉，你個死𡃁仔成日騰晒雞，總之根據過往經驗，佢一改行賣中國人嘢就一定唔掂嘅！
侍仔：既然林伯你咁講，就信你一次啦！
林伯：咁就乖仔啦！整場英超聯揭幕戰你啦，買利記單W，我個英格蘭隨軍記者舊同學，話錫菲聯實力係3支「升班馬」最差嘅。
招積域：係真唔係呀，成日話有隨軍記者爆內幕，我係佢爆畀英國小報都唔話你知啦阿伯！
林伯：唔信還唔信，唔好咁嘅語氣！整場「升班馬」對家3串1過關賀聯賽開鑼。
招積域：阿伯，賭吓其他好過啦，尾關保頓對熱刺，都算係今晚較強戲碼。
菠蘿文：開鑼日我多數只睇早場，橫掂第1場賽果唔代表咩嘢，贏咗又如何？
保頓熱刺有睇頭
侍仔：波我就唔賭啦，但支持一下「升班馬」繼續拎好成績啦。富咸、樸茨茅夫同舊年韋根都係首戰不俗表現球隊。
文仔：頭炮對一班只靠「士氣波」搵食球隊好重要㗎。
林伯：「樹氣」可以當飯食囉真係！？踢波最緊要有技術，即係個陣容要強，領隊要有品！錫菲聯個禾諾克成日係場邊「問候」對方領隊媽媽，又係咁整粗口手勢，佢揭幕戰都可能被罰出唔到場，咁點可以唔輸俾利記？
菠蘿文：老人家果然有見地！
招積域：阿伯，我請你食個早餐，你以後彈啲內幕貼士過我啦！我好想斷窮根呀真係！
侍仔：想斷窮根就買阿伯對家啦！阿伯，我擺明係你對頭人啦以後。
高洛文