話約話約，約咗半年先至可以同班舊戰友敍舊，冇計啦！家陣惡搵食，冇得話隨傳隨到喇！晚市醫肚時間踩落旺角，車水馬龍，人頭湧湧！唔預約？就梗係「等」㗎啦！
終於坐定，即刻叫個三二一健康比例晚餐，再加個老火例湯，難得重聚，梗係緬懷傑志初升甲組嘅難忘場面啦！嗰陣季前集訓，練來練去，你眼望我眼都係得8對腳，連11個人都唔夠，惟有大量起用青年軍球員，球圈人都一致認為呢班年輕人只屬護級分子；結果出人意表，喺有限資源嘅情況下，我哋竟然踢到拎聯賽亞軍同足總盃亞軍，仲喺大球場打贏埋AC米蘭！連boss都話抵先攞命！
莫因己見強人所難
呢班開國功臣都異口同聲，話嗰年係最齊心最有士氣嘅一年，就算係輸波，隊友之間都無話詐形，一齊去承擔，全隊人都打成一片，就好似擁有同一脈搏咁。
轉頭又傾起港隊球員被批評紛紛退隊一事，事出必有因，當事人作出選擇，必經過深思熟慮，還望諸君莫將一己之見而強人所難。
馮嘉奇
踢出香港的傑志球星，親身歷盡各國足球風情。