世界盃完咗個幾月，話咁快又到英超開鑼，一眾賭波客一定非常開心，事關英超風格快上快落，睇住兩隊波喺度鬥攻，呢頭入完波無耐，嗰邊又入番你一球，所以話一邊買波一邊睇波，一樂也。
言歸正傳，第一輪嘅聯賽都算幾好賭，強強嘅對撼唔多，只有保頓對熱刺，但呢啲波最好避咗唔買。要買嘅不如買4大豪門啦！
社區盾利物浦贏咗車路士，有睇場波嘅都認為紅軍打得好好，幾名新將表現良好，明顯已經融入咗球隊，首輪作客對住僅屬「升班馬」嘅錫菲聯，應該問題不大。
車仔贏波有難度
反而佢係社區盾嘅手下敗將車路士，因為中場波歷克嘅加盟，令到同樣司職中場嘅林柏特，位置有些少重叠，情況就好似英格蘭國家隊同謝拉特嘅場面一樣；另外仲有祖高爾受傷，對其突入邊線進攻突破也有所影響。車仔首輪對曼城雖佔主場之利，但後者如果龜縮喺後場死守，車仔要全取3分都有一定難度。
另一方面，阿仙奴今季喺新球場第一次主場出擊，面對實力唔高嘅維拉，理應可以輕取對手，藉此賀一賀新球場嘅正式啓用。曼聯方面，雖然走咗雲佬，但C朗(基斯坦奴朗拿度)愈係俾人鬧，佢嘅表現就愈好，主場面對富咸，贏波無問題！
立博亞洲區首席博彩顧問
謝利
電郵：[email protected]