恒指高低波幅98點，埋單跌42點。短期個市，仍係偏淡少少。
中移動（941）半年多賺26%，中期息62仙，增17仙，另派特別股息9仙（去年冇派）。咁嘅成績表同派送，市場當然收貨，但股價反應則係先升後跌，典型嘅趁好消息出貨，始終年初至今已升41%，有獲利回吐好正常。中移動C輪與P輪，暫時唔適宜買賣，揸C輪驚正股牛皮或回吐，揸P輪則嫌溢價過高。個別仲有兩三個月命嘅中移動P輪，溢價20%以上，將來最大用途係打邊爐之時用嚟墊煲底。
思捷C輪：威水恒指成份股No.1係思捷（330），收64.55元，升3.5%。美林出報告話好，即刻彈升。咦，原來報告出之前，已經先升4日，5日夾埋升幅12%。大行將股票評級調落調升，又有銀彈配合，搵食似乎唔太困難。
係都手痕，要搵思捷C輪炒，2166最靚。隻輪12月初夠鐘，輪價73仙，溢價2.5%，槓桿率8.8倍（有效6.6倍），引伸波幅33%。不過睇吓近期累升唔小，又買唔落手。
中信C輪：中信泰富（267）升2.3%，成為威水恒指成份股No.3。賭中信C輪，最揀得過嘅係4585，9月尾夠鐘，輪價1.28元，溢價2.6%，槓桿率18.9倍（有效11.9倍），引伸波幅33%。世上冇嘢話冇風險，正股下個月如果回落2.7%，隻輪冇得剩。
章盛