新一季英超聯，有好多關注點！車路士能否成為聯賽冠軍？阿仙奴、曼聯同利物浦前景如何？「升班馬」雷丁有幾犀利？由今晚開始，大家就可以知得一清二楚！
小弟前兩次都出師不利，社區盾車仔輸畀利物浦，到周中西班牙悶和冰島兼開細，出晒事！我當熱身啦，今晚我提供的貼士會準少少啦！講多無謂，貼士最實際，無謂浪費球迷讀者睇我的吹水文！
雷丁勁過韋根
今明兩晚，先講邊幾隊會主勝啦！阿仙奴有新主場，今晚迎戰維拉，邊有得輸，我估佢主勝兼開大。
另外，愛華頓同紐卡素都打主場，好有機會頭彩，我撐「主勝」！至於今日心水，冷冷地，博雷丁主勝，搞掂「海鮮波」米堡！
至於被視為「黑馬」的熱刺，今晚我決定一於齋睇，佢對手保頓專打老虎，各位球迷小心！
至於車路士，社區盾利記真係出B隊，你精銳盡出都輸，呢一鋪我真係無眼睇！聽晚主場對曼城，領隊摩連奴肯定好大壓力，球員亦好大壓力，咁高身價，今場如果唔交足貨，仲使出去食飯，各位一於信多我一次，支持車仔！最後，今季我為曼聯fans焦急，前鋒缺人，點算！我都想知！
商業1台《球迷集中贏》主持周鵬
電郵：[email protected]