呢頭剛講完「引君入甕夾死為止」，嗰頭便即時有兩隻熊（證）被「毒死」。為甚麼不說強行收回、即時死亡甚或打靶，硬要說毒死？
「西毒」毒過歐陽鋒
賭仔願賭服輸乃天公地道之事，落得注輸咗，只歎自己眼光唔夠或運氣唔好，從來不會有任何怨言。然則見到周四殺熊之陰毒招，不要說身處其中的㷫過火屎，連冠一這局外人也睇到眼火爆，呢班「西毒」（當然毒過金庸小說《射鵰》中的歐陽鋒百萬倍）早前試過「無厘頭」將恒指狼到狂「夾」上17300點，殺了6209和6211兩熊證後，發覺「熊掌」美味非常，遂食過翻尋味。上次要「夾」300點，怎樣也得落點本錢，今次只需落些少砒霜推一推上17506，僅6點兩隻熊（6204和6214）便自動瞓低，鬼咩，個名都衰過人，甚麼「碌易寧死」、「碌易實死」，唉！之後恒指返落17500之下百多點，如果話係純屬巧合，你估有無人信？
汝等有無睇8月11日「牛扒熊掌任君選擇」欄，內文寫道：面對這班睇住你嚟殺的大鱷，仲假過開字花……為甚麼開出的「賭枱」（窩輪）如雨後春筍？為甚麼請君入甕時講到天花亂墜，到你想出貨或平倉時往往不易「劈價」過闊或不合邏輯？話口未完，又有一批人做咗有心人的點心了，買六合彩有一絲希望之餘，唔中都有部份係做咗善事，賭呢啲死咗多謝都無句。冠一敢冒天下之大不韙，並非想阻人家搵食，而是為揸住張「死熊證」之士不平鳴而已。
個市無厘頭上升的藉口是利率見頂喎!?看官，有沒有留意昨日已有大行跳出來話，千祈不要以為通脹受控、甚麼資金可能流走、港股已高處不勝寒……難道真係食「熊掌」食到滯想鋸「牛扒」乎？
王冠一