葉文輝（啤梨）前晚在伊館舉行尾場演唱會，當眾拉着鄧麗欣（Stephy）的玉手，聲言要放在重要地方，嚇得她不知所措。啤梨更大唱《好心好報》，擺明車馬挑戰Stephy緋聞男友方力申。
葉文輝前晚於灣仔新伊館舉行尾場演唱會，邀得陳慧琳、關心妍和鄧麗欣任表演嘉賓，他首場演出時將手放在鄭融的胸側，而前晚他又繼續發揮其熱情個性，對每位女表演嘉賓都又拖又攬，艷福無邊。
觀眾大嗌：咀佢
當啤梨介紹鄧麗欣出場時，拿她跟方力申的緋聞開玩笑，他說：「有華人嘅地方就有鄧麗君，而方力申嘅緋聞就有鄧麗欣。」兩人其後手拖手唱《其實你心裏有沒有我》，而台下觀眾對他們非常受落，有觀眾更大嗌「咀佢」。
啤梨更口花花吃Stephy豆腐，拖着她的玉手說：「想將你隻手放喺重要地方。」此話即時嚇呆Stephy，猶幸他只是將女方的手放在自己胸膛，再向對方唱出《好心好報》中的歌詞「明明比他更好，旁人都知我好」，擺明車馬向女方緋聞男友方力申挑戰，弄得Stephy一臉尷尬，她說：「我感覺到你心跳。」
另一嘉賓陳慧琳則跟啤梨合唱《紀念日》，縱然啤梨穿上三吋高跟鞋再戴上大花帽，但二人仍然只算是平排，當啤梨轉身返後台時，Kelly見到他的大露背西裝，登時大叫：「你件衫成個背露出嚟，我啲演唱會都冇咁勁。」至於關心妍在台上則送上一條豹紋T-back予啤梨做禮物。
「綵排都冇呢樣嘢」
事後問Stephy被啤梨情挑而弄得一臉尷尬，她說：「事前我唔知佢將我隻手放喺心度，因為綵排都冇呢樣嘢，所以唔知畀乜反應佢。」那麼可有聽到有歌迷大叫啤梨咀她？Stephy笑說：「聽到，但唔會喇，啤梨好gentleman。」
至於陳慧琳的年齡問題在網上掀起風波，有指她明明屬鼠，但說自己屬牛，她前晚回應說：「係啲人幫我測運程講啫，我自己就冇所謂，又唔係差好多，差一年。」
採訪：駱華齡
攝影：陳偉權
