早排炒過一輪越南概念的陸氏實業（366），近期原本比較靜局，但昨日突然發難，急升14.52％，收2.13元，創下近年新高，昨日成交配合升勢，金額增至1428萬元。
經紀陳話，其實原因好簡單，因為陸氏將在本月底或9月初，公布截至今年6月止的中期業績，據講會令投資者眼前一亮，所以有春江鴨買定貨炒業績。小初心諗，連公布業績日期都未見到，咁快就炒定先？
至於陸氏方面，就發咗個例牌聲明話不明股價及成交上升原因。
另外，股票號碼同陸氏實業有多少相似的華寶國際（336），早排在2.80元大折讓批股，大股東以每股2.20元減持舊股，復牌後股價曾大跌至批股價水平，但沽壓消化後，果然升勢再現，昨日升5.86％，收2.71元。
經紀黃話，據講部份芬佬在批股之時，雖然已經要咗唔少貨，但仍然覺得唔夠數，所以繼續在市場吸納。
慕容小初