我哋又見喇！唔經唔覺英超又開鑼，大家嘅心情係唔係好高興呢？又可以見到靚仔同有型嘅球星。講番英超開鑼賽事先，利物浦對錫菲聯，利物浦今屆誓奪英超冠軍，買咗好幾名球員，有比拿美、賓納同麥克干沙利斯等等有質素嘅球員，加上舊有班底，可以話比上季強。
希望曼聯重現霸氣
但係，利物浦喺熱身賽幾場賽事都輸波，好彩歐聯第3圈賽事，以主場之利，先可以小勝對手，真係替賓尼廸斯擔心，所以我覺得利物浦開鑼戰只能小勝對手錫菲聯。
另外兩場心水賽事，係曼聯對富咸同衞冕嘅車路士對曼城。曼聯今季想買嘅球員，唔係俾其他球隊買咗就係球員唔想過曼聯，只係買到卡域克，真係慘。不過，曼聯熱身賽又踢得好好喎，希望佢哋今季可以踢番以前嘅霸氣！跟住就到最後嘅車路士，唔使講，勁！佢哋用天價買舒夫真高同波歷克等等球員，季初可能會唔係好夾，但係第一場賽事只係對曼城，應可以輕勝。
TOBY梁靖琪
走出女生宿舍依舊人氣高企，不惜捱更抵夜睇波。