向來衰多口嘅林敏驄，繼喺世界盃節目辣㷫李克勤同阿叔林尚義之後，前晚竟然連後輩薛凱琪（Fiona）都唔放過，仲句句有骨㖭。
唔信借緋聞谷碟
前晚Fiona同蔡少芬、苗僑偉喺將軍澳電視廣播城錄影由林敏驄主持嘅節目《心大心細》，Fiona入廠前先除咗件外套，林敏驄見到就話：「啲歌星真係麻鬼煩，扮晒嘢，除乜嘢衫吖？」Fiona聽到淨係識得笑。
入廠之後，Fiona企喺眾人中間影合照，林敏驄又窒佢話：「一個屈尾十，又攝咗個中間位。」隔籬嘅蔡少芬都睇唔過眼話：「係我叫佢企嚟中間嘅。」難得嘅係Fiona兩度被窒仍然保持笑容，頗有大將之風。
早前有雜誌話Fiona與房祖名同遊東京，女方仲搵嚟好友鄭融做擋箭牌。噚日一對緋聞情侶分別接受商台嘅電話訪問，齊聲否認拍拖。
前晚祖名喺又一城出席日本國寶級藝術家天野喜孝嘅作品展，被追問傳聞指佢為咗追Fiona而借鄭融過橋一事，祖名話：「佢哋借我過橋先真，鄭融借我過橋，因為早排傳佢哋斷背。」
祖名強調無意追求Fiona，對於有指女方借緋聞宣傳新碟，祖名即刻幫拖話：「係都我利用佢啦，佢喺香港咁紅，唔使啦，我信任佢唔會咁做。」
