萬眾期待嘅英超聯終於喺星期六開鑼嘞，全周嘅心水係兩支倫敦地區次一線球隊──雷丁同埋「鎚仔幫」韋斯咸，請對家兩位新領隊吃悶棍。文：蘋果波神
話過呢個欄會盡量避免貼直播波，所以全日熱選，決捧自己略為偏愛嘅韋斯咸。兩、三年前有幸買張30多鎊嘅波飛，一支公到烏普頓公園球場捧佢哋踢英冠對克魯嘅比賽，估唔到柏度話咁快將隊波重上正軌。
查爾頓執完位難睇好
以班底計，呢班波應值英超前八分子，呢場雖有中場艾法寧頓因傷缺陣，但相信亦影響唔大，有班拿約校炮，一眾夾慣嘅英國土炮射手攻堅，陣容變動不大季初點都着數啲；反而查爾頓有名聲極高嘅古比士利離隊，換上前水晶宮領隊杜維，執過位個人睇得相當淡，到𠵱家重係咁買人，驚佢哋季初大脫腳。呢場主隊讓平/半，點睇都坐和望贏，就博「鎚仔」旗開得勝啦！
冷選雷丁呢支「升班馬」，佢哋上屆喺英冠聯以無敵姿態，替我贏咗唔少，今季升上英超，個人覺得佢哋唔可以睇小，是否作長線投資暫言之尚早，但星期六主場迎戰米杜士堡時，就千祈咪放過佢嘞。
雷丁熱身賽9勝1和
點解對雷丁咁有信心？雖然近三屆英冠聯冠軍升班之後都表現麻麻，令人對佢哋失晒信心；不過，綜觀呢啲英冠冠軍咁失敗，原因不外乎有兩個：一係人腳改變太大，根本冇默契又踢唔出隊形，一就係人腳冇改變，但其實唔夠班。
好彩，上述兩大錯誤雷丁都冇犯，佢哋今屆人腳以升班功臣為主，只係加入咗南韓國腳攻擊球員薛琦鉉同埋後衞賀爾斯及蘇廸，加上佢哋本身嘅班底好，好似前鋒傑臣、列達、中場干維同埋後衞索尼咁，都係有質素又當打嘅球員，有咗英超經驗後話唔定愈踢愈好，喺領隊郭甫統領下，雷丁呢隻股真係可考慮「長揸」。
就首戰對米杜士堡而言，雷丁雖然有前鋒沙恩朗因傷或未能披甲，但佢一直都唔係正選，加上中場薛維爾一直有離心，佢想走就梗係要大踢好波吸引買家啦！而且雷丁近況真係「弗」，熱身賽未輸過（9勝1和），對士氣好有幫助。
修夫基無牌教波難信
至於對家米杜士堡今屆由無牌領隊修夫基執教，對佢嘅功力始終有保留，加上又有主力好似後衞基度爾同埋前鋒哈索賓基離隊，真係驚佢哋好似東北鄰居新特蘭咁，由昆尼帶隊開季3連敗！
投資特攻隊金句
韋斯咸實力值英超前八分子，雷丁以無敵姿態升班，今次有力攜手開W，打響頭炮。