英超開鑼，相信唔少波友同筆者一樣，懷住一個興奮心情去迎接；講緊除咗係公仔箱睇到唔少自己喜歡嘅愛隊同球星打生打死外，當然係大家亦視之為最願意攞真金白銀去投注嘅賽事。
數個月前，與一位馬會公關大員飯局，聽對方講原來英超聯可以佔足智彩全季八成半嘅投注額，從以上數據得悉，可以引證呢個聯賽喺港人心目中嘅魅力；「收費台」喺呢兩個禮拜公布業績前後，股價已勁跌十多巴仙，與呈狂牛之勢嘅大市背道而馳，同分析員及一般股民都驚佢哋嗰台下季冇咗呢隻「金蛋」轉播權，而齊齊唱淡不無關係。
當然無論你對英超幾瘋狂，球迷投注任何賽事，始終贏錢嘅人佔少數；但大家願意傾注入英超聯，咁真係要賭得聰明啲。
資訊充足唔驚買早飛
呢個投資學堂由小弟主理，當然主攻都陪筆者度過二十多個年頭嘅英國波，我同大家一樣，每次賽前對自己賭英國波每有無限信心，呢份經驗日後會續同大家分享。
今次貼士，可以參考本版頭條，在此不作贅述；我今日想講嘅係莊家為搶呢盤大生意，每每提早開盤，甚至提高賠率；以吸引波友落叠，足智彩今午有售，澳彩更早一天，一些海外莊家，更在兩三星期前已定出開鑼十場波嘅賠率。
正因為資訊足加上賠率早開，所以呢個聯賽實值得波友買吓早飛，尤其是四支超級勁旅嘅直播波，如果軍情不變，基本上由開飛起必被散戶愈買愈熱，所以今個禮拜要買阿仙奴同曼聯炒維拉同富咸，無論讓球主客和同波膽，今日都要嗱嗱臨下注，明未？
文：蘋果波神