噚日有線人同華華報料，話有人假冒福田實業旗下嘅福安廠房，上書北京中央投訴點解當局淨係針對福田嘅污水處理問題，仲話全行都係咁樣做喎！華華梗係即時搵當事人回應啦。福田發言人聽到都好震驚，話佢哋真係諗都冇諗過，簡直匪夷所思！
福田發言人話，自從福安廠房被評定不合乎內地環保規則，集團已經將該廠約三分一嘅染布機停機，並趕工喺附近起一個污水處理廠。估計污水處理廠應該可以喺今年第四季投產，即係話停工嘅三分一染布機可以同時復工啦！發言人仲話，雖然嗰批機器嘅產能，佔成間公司總染布產能嘅10%，但係由於福田喺好多地方都有設廠，啲定單經已轉移去其他生產基地，實質影響唔係咁顯著咁話喎！