雖然政府不斷吹噓經濟復蘇，百業興旺，不過做電影嘅嘉禾電影主席鄒文懷就慨歎，電影業生意仍然難做。05年香港全年電影票房只得8.15億元，仲要1年比1年低，前幾年嘉禾投資製作拍攝嘅電影都損手爛腳離場，直到今年第一季將業務轉型為電影發行，擴大市場佔有率至35%，才得以轉虧為盈。
不過戲院就唔同講法，鄒生話會投資近1億元喺深圳、北京、台北同新加坡興建影城，分別有六個同八個廳嘅深圳影城將會喺07年底完工，北京影城就期望趕得切奧運前起好，有九個廳嘅台北影城喺08年頭開幕，有十五個廳嘅新加坡影城下個月都可以開工。佢仲話，做戲院雖然係長遠投資，但只要有系統地管理，回報自然穩定，順勢讚自己接手台灣華納威秀四個月就轉虧為盈。
近期成日傳六叔會退休兼賣盤，鄒生就笑笑口話六叔身體不知幾好，近百歲都未真正退休，邊會咁早退下火線吖。