富豪最鍾意做乜？打golf之外，睇怕都係出錢贊助教育事業培育人才！好似恒基大老闆李兆基，咁多年捐咗幾多畀學界，睇怕佢都唔記得，噚日又到牛津大學「李兆基學位」嘅活動，資助幾個傑出學生哥，去英國牛津讀書。
身為主人家嘅四叔，第一個到場，知道楊官楊鐵樑同另外兩個老外評審仲未到，就笑笑話要飲啖茶，食兩件點心先，跟手仲好有興致咁，行埋電視台嘅攝影師度，研究吓點解有啲台，影出來嘅色彩會差啲，仲問係咪因為機器舊？而大內總管林高演，就成晚傍實老細，打點一切招呼賓客，鬼咁周到。
冇學生投身恒基
終於等到齊腳，咁難得四叔肯坐定定答問題，一眾傳媒又點會唔醒水，所以全部題問都集中晒問四叔，仲要齋講廣東話，搞到排排坐嘅楊官發晒吽哣，悶到玩柺杖，啲老外就全程陪坐，聲都唔聲吓；終於公關都忍唔住出聲，呢個時候楊官先至笑番！
唔講唔知，呢個獎學金搞咗27年，每年都會揀四個學生哥，但咁多年以來，竟然冇一個得獎者，喺學成歸來之後，投身佢恒基旗下！
做善事係唔望回報嘅。四叔一轉話題講投資，佢話自己專揀啲大大隻，有代表性嘅藍籌嚟買，即係好似中行咁，事關呢啲都好難輸，嚟緊佢就吼實工行同招商。
講到接班人，佢就話兩個仔都係，事關啲嘢多到兩個都做唔晒。四叔之前實牙實齒講今年唔會辦喜事，但既然佢講到阿仔，華華都忍唔住再問多佢一次，今年會唔會娶新抱？佢竟然口風轉一轉，話唔知住，跟住又笑笑口話，阿仔都仲未叫佢擇日。
李華華