我哋《蘋果日報》，前日報道微軟（Microsoft）宣布，將出售畀用家/玩家版本寫遊戲嘅軟件叫做XNA，等玩家可以嘗試自己寫電子遊戲，繼而放上網喺XboxLive同其他機民分享。玩家編寫嘅遊戲，當然只可以用微軟出品嘅Xbox電子遊戲機玩。
大家可能會問：「Xbox係乜嘢？」電子遊戲機即係Atari、任天堂紅白機、SonyPlaystation之類專係畀人打機嘅電子產品。唔似可以兼顧埋打字、計數、上網睇短片，乜嘢都可以做嘅電腦。
不過，孫柏文一睇到呢段新聞，就即刻諗起花旗國影星史泰龍飾演嘅拳手角色《洛奇》。喺史泰龍1985年嗰齣戲《洛奇第四集》裏面，喺齣戲嘅尾部，洛奇啱啱喺莫斯科擊敗蘇聯拳手之後講咗一句：「IfIcanchangeandyoucanchange，everybodycanchange。」（如果我可以變，你又可以變，個個都可以變。）當然，洛奇講呢句說話，係喺度「溫馨提示」戲中有份睇拳賽嘅蘇聯共產政權，話就連佢哋都可以變。
最後，蘇聯共產政權瓦解令到世界政局展開新一頁，我都唔知有幾多功勞歸於《洛奇第四集》呢齣戲。不過，微軟呢個特登令到玩家可以嘗試自己寫遊戲，跟住免費同其他人分享嘅舉動，為遊戲機世界帶來嘅震盪，真係比得上蘇聯共產政權瓦解。
大家可能會問：「微軟畀機民自己寫遊戲，邊度可能會好似你講得咁嚴重。係唔係隻金手指篤錯？」冇錯，機民自己寫遊戲絕對唔係戲肉，戲肉係微軟鼓勵機民寫完遊戲之後，免費同其他機民分享、派發。呢個舉動會帶來震盪嘅原因係因為完全顛倒、放棄遊戲機公司傳統賺錢嘅方法。
Xbox學iPod
遊戲機公司傳統賺錢嘅方法，係盡量補貼遊戲機本身嘅價錢，可以話「賣一部、蝕一部」，盡量谷高銷量。跟住有人有興趣為遊戲機出遊戲嘅時候，就叫遊戲出版商畀錢，畀版稅。由八十年代中，可以玩「孖寶兄弟」（SuperMarioBrothers）嘅任天堂紅白機，就已經係咁。到今時今日，就算係微軟本身嘅Xbox都係有補貼，都係「賣一部、蝕一部」。大家可能呢一刻會問：「如果微軟補貼Xbox又鼓勵機民寫完遊戲免費派發，唔通佢哋黐咗線？」
其實微軟只係向「乜嘢軟件都可以被翻版」嘅現實低頭，不過微軟係有方法搵錢。首先，微軟會每年問用XNA寫遊戲嘅機民收取99美元。亦因微軟係局限機民喺XboxLive先至可以分享、下載遊戲，而因上XboxLive係要交月費嘅，所以微軟先至會鼓勵機民分享遊戲。不過，遲早都會有「黑客」Hacker，令到分享遊戲可以喺XboxLive以外嘅互聯網免費進行。
所以，我話今次微軟係抄足蘋果電腦，想有一日賣機搵錢。蘋果電腦搞可以下載音樂嘅itunes，其實係冇錢賺，搞itunes嘅原因係想賣多啲iPod音樂機，因為免費盜版下載mp3根本令網上賣音樂冇錢賺。呢個亦都可以解釋點解itunes下載音樂，差唔多最好係用iPod去聽，如果用其他機會煩好多。蘋果電腦同微軟都向現實低頭，用其他方法搵錢，其他公司會唔會呢？
孫柏文