大家仲記唔記得里奧費廸南喺世盃嗰陣，搞咗個電視節目叫《世界盃大整蠱》，專門整蠱啲英格蘭隊友，內容包括扮綁架碧咸，呃朗尼整死「粉絲」隻狗等等。據聞里奧玩人玩到上晒癮，食住條水，決定再拍單大嘢，諗住玩好多球星、名人，包括名宿伊恩胡禮，里奧唔全職做編導嘥晒。
近年里奧同著名經理人兼好友納撒尼爾，合資開咗間製作公司進軍娛樂圈，性質梗係主打整蠱吓啲球壇明星，等佢哋出洋相增加收視。聽講《世界盃大整蠱》呢個節目有成380萬人次收睇。里奧見節目咁收得，佢𠵱家計劃食住條水再拍幾輯，實行玩人、過癮、搵錢三瓣樣樣齊。
傳多拉素拍杜帥冇得入選
不過拍片呢家嘢好講天份同際遇嘅，好似法國國腳多拉素咁，一向都鍾意揸住個view-cam周圍影，佢早前就喺世盃期間拍低咗更衣室裏面嘅花絮，將呢啲咁珍貴嘅畫面剪輯成紀錄片，仲派街坊畀人睇。
哼！點知好衰唔衰，法國教練杜明尼治原來成個《賭神》入面嘅高進咁，從來唔會畀人影相，就算影都只可以係背面。聽講多拉素冇份入選法國對波斯尼亞場友賽，就係激嬲咗杜明尼治，睇嚟下次佢最好自己收埋食好喇。
「人拍嘢佢拍嘢，多拉素就拍到連國家隊席位都冇埋，如果求大俠係佢，一定會將杜明尼治嘅車頭相當宣傳單張咁周街派，橫掂都冇份入選，不如搞大佢一拍兩散啦！」