無論做生意定投資，即使睇幾多天書或者投資建議，都唔及得自己親身實證觀察，攞個感覺咁實際，噚日又有一個活生生例子。話說大陸7月啲砵砵車銷情唔係十分好，優惠同埋特價促銷活動再次湧現，鞍鋼新軋鋼董事長劉玠嚟香港開業績記招，大家好自然問吓佢，怕唔怕汽車銷情放緩會影響鞍鋼啲汽車鋼板銷路呢？
點知劉總即時露出一副冇有怕嘅表情，話一啲都唔擔心，何解？原來佢周圍啲朋友及同事，都成日響處討論買咩款式嘅車，東風日產部騏達好呢？定係其他新車好？又研究買咩價錢，依佢判斷，內地買車熱潮已出現，所以佢非常睇好呢個行業，亦唔覺得一頭半個月銷得慢啲會對汽車鋼板有咩影響喎。
看官，若然手上仲有大陸汽車股兼喺度心大心細，唔知好唔好走咗佢，聽完劉總呢番話，應該疑竇頓消，識得點做啦！