港股昨再創今年新高17473，恒指最後收17451，升176點。即月期指由低水56點變為高水11點，升夠244點，收17462。有個沽咗期指嘅老友，學足尤伯連納肺癌死前錄影的電視戒煙廣告口脗話：「如果我冇造淡，今日就唔會喺度同你哋講……」
趙飛雲雖然係好友底，但都安慰老友唔使太灰心，如果周三晚美國所公布的7月核心CPI較市場預期高，將會輪到淡友反攻。事實上，杜指周二晚雖大升132點，收11230，但仍未突破雙底頸線11250，不似日股及港股已出現技術破位，反映美國投資者仍要睇埋CPI數據，來判斷美息是否真的見頂。
不過，技術上恒指昨破旗而上，按量度升幅，短期可見17680水平，淡友如果唔投降，可能今日要再捱多棍。
大市昨日升勢由重磅藍籌掛帥，倉內股票得益唔算太多，泓廸（8143）升1仙，收0.75元，太A（019）升0.40元，收82.40元，麗豐（1125）升0.005元，收0.34元，聯康（690）跌2仙，收3.99元，以上各股部署暫時冇變。
短線睇4元
美聯（1200）昨日走勢相當波動，開市抽上3.73元，升逾3%，其後逐步回落，趙飛雲在3.64元掛牌買5萬股，原先諗住買唔到，尾市突然有沽盤狂質至3.60元，結果一買到就要坐艇，但最後又戲劇性抽回3.66元收市。按理現時地產股炒息口見頂，唔會冇美聯份，短線睇4元，中線睇5元，短炒暫以3.58元作計數位。
今日會睇睇日股會否有回吐，若補回昨日的上升裂口15962就止跌，會考慮買些少日經C輪2125短炒，但炒日經輪多咗時差及滙價兩項風險，其實更加難玩。
趙飛雲