年輕人愛新事物，新科技、新產品都打佢哋主意，好似手機嘅3G服務，都愈嚟愈多年輕人用，CSL市務總經理溫麗賢都話，好多後生仔女都偏向使用速度較快嘅3G電話，截至6月底，單係CSL嘅3G用戶數目已經超過10萬。雖然3G月費最低要138元，比2G月費60元貴一倍有多，但係𠵱家愈嚟愈多人用3G，單係睇吓近期索愛（SonyEricsson）、諾基亞3G電話有幾好賣就知。
CSL嘅業務比例，亦由以往3G對2G嘅三七比，上升到𠵱家各佔50%；客戶每月平均消費340元。而2月先推出嘅「3G隨身TVB」用量增長數目都幾驚人，喺過去3個月，每月增長達70%，如果華華份人工增長有咁高速就好咯。