恒指昨日又創今年新高，但挾嚟挾去都係依靠幾隻大藍籌，小初最愛玩的二三線股始終未成氣候，走勢好多時升一日跌一日，搞到大市雖然係咁升，但小初就冇乜錢落袋。
世茂房地產（813）前日獲高盛品題後，股價急升。昨日雅居樂（3383）獲大摩推介，股價亦大升8.8％，收5.44元。小初真係諗極都唔明，究竟係大陸地產股抵買得交關，定係班芬佬當內地宏觀調控冇到？
大陸地產股當炒，經紀黃順勢推介埋上海置業（1207），隻股將在下周一公布中期業績，照計應該見得人。聽講隻股未來一段時間陸續有大動作，公司名稱雖然叫做上海置業，但實情已經衝出上海，早排在瀋陽收購商住物業項目，聽講好快又有其他新項目公布。
上海置業近期股價由低位回升唔少，昨日再升1.69％，收1.81元，成交金額2805萬元。
慕容小初